راحل ٍ ليل الشباب ومقبل ٍ صبح المشيب
والمشيب المقبل أحلى من تباريح الشباب

والعنى نفس العنى والجرح عيا لا يطيب
يالعنى ما شاب راسي بس قلبي حيل شاب

من نصحني لو قسى بالنصح له بالصدر طيب
وإن سألني لا يضيق إن كان ما حصل جواب

أتحمل طعنة السكين او خنجر عطيب
ولو ذبحني من طعني من عزومي ما أهاب

لو تواجهني سباع المشكلة بأنياب ذيب
جيت حيد ٍ ما تهمه لا سباع ولا ذياب

لين جيتي تكتبين بخطوتك حظ ونصيب
كنت أظنك وافيه وأثرك من الدنيا عذاب

نعنبو دارك صبرنا صبر ما جابه حبيب
لين صرتي باللعانه ما تحسبي لي حساب

اسمعيني قبل اغادر لو عجز عني طبيب
جرحي اقدر اكتوي بالنار لو ما الجرح طاب

تحسبين النار سهله ؟ وتحسبين اني صويب ؟
لا يغرك جرح قلبي واتبعي بعينك سراب

وان تبعتيني ترى سرب القطا لو هو يغيب
يرجعه من بعد عام ٍ عشق لأجواء الضباب

وأما انا لاقلت راحل اعرفي بإني مصيب
ما رجع قلبي لوصلك لين يبيض الغراب

ليه ألوم الليل وانتي من جعل ليلي كئيب
وليه ليلي ما يلومك وأنتي اسباب الغياب

وليه ألوم الناس تاخذ من وفانا ما تجيب
وانتي اللي غارسه في غاربي عشرين ناب

وليه ألوم الوقت وانتي من جعل وقتي عجيب
كان ليلي بالنهار وكان حلمي بالسحاب

كنت في دنيا غرامك أجمع الماء من قليب
وانتي اللي ما جمعتي غير هم ٍ واكتئاب

انتهت ما عاد فيها المسأله شك ٍ وريب
ولا تظنيـني معـاتب أو مفـكر فالـعـتاب

خلي الغاوي يردك للغوايه من قريب
واما أنا انسي غرامي واقطعي عنه الشراب

كان نبته طاهرة تشرب من الفج الصبيب
لين صار الماء عليه ألوان تجمع سم داب

من بعدها صار شمس ِ شارفت وقت المغيب
غايبه شمس المحبه وأجمل الاحلام غاب

يوم جيتي في حياتي كنت رجال ٍ غريب
ولا رحلت أكتب مروري بدنيتك صفحة بكتاب

ما تغير صفحتك دنيا بها جو ٍ رحيب
باستفيد امن تجارب إن خطا والا صواب

قادر ٍ اخفي بقلبي حزن وطعون ولهيب
وقادر اجعل قلب غاده لي وطن بعد اغتراب

وابتدي معها بعشق ٍ آخذه منها وأجيب
غالية في وسط قلبي عاليه مثل الشهاب

كنها وردة بنفسج داخله بمرعى عشيب
تشرب النسمه وتسقي غيرها منها صباب

لا انثنت ما كنها الا غصن رمان ٍ رطيب
ولا اقبلت غنى لها الشادي ( هلابك يارحاب )

ماهي مثلك لا ولا مثل العذارى للصحيب
روحي وانا قـفـلت دون رجوع قلبي ألف باب

والحياه اللي معك ليل ٍ شبابه لو يشيب
زادت الدنيا كئابه في مشيبه والشباب