يا طير يا حر ٍ بيعده هقاويه
لا تغرس المخلاب في كف صقار

جرحت كف اللي دوامن تخاويه
بأتفه سبب يا طير قصرت مشوار؟؟

أتلا الوعـد بالطير راح لفلاويه
ولا راح طير ٍ حر ( كسر ٍ بلا جبار ) 0

لا واوجودي كان غاب اف حراويه
وجد الذي فاقد مع الناس الإبصار

في ظلمة يمشي وغابوا عزاويه
وراح العمى يرمي بنفسه للأخطار

ويا وجد حالي وجد من غاب هاويه
وأمسى وقلبه بين الأضلاع منهار

وعقله لحق قلبه وزادت بلاويه
واضحى بلا قلب ٍ ولا عقل محتار

ترمي به الدنيا ويتبع خلاويه
وأهله رموا به بعد مده على ( شهار )

لا واعذاب القلب من فقد حاويه
وقلبي حوى طير ٍ تغيّب بعد طار

والله أحبه حب ما ني بقاويه
حب ٍ من الله لا تقدم ولا صار

حبه بقلبي لا...ولا.. أحد ٍ يساويه
حب ٍ على عـزٍ وجود ٍ ومقدار

وقلبي من اللي صار محد ٍ يداويه
جرحي عميق وطاري البعد جبار

يا هل ترى هالطير يرجع وأخاويه
وإلا يظل الجرح ينزف على النار