قفلت الباب وأشعلت الهموم بداخلي مصباح
بليل ٍ يطوي ثياب السعادة بالخلا الخالي

شكيت وكنت أظن اللي بليله يشتكي يرتاح
وأثاري كل ما تشكي تمادى ضيقة البالي

جمعت الصبر في ليلي يقولون الصبر مفتاح
وأنا ضيعت بيبان الفرج والصبر بي طالي

رقيت جبال بأحلامي وأسلي خاطري بأمزاح
وشاب من العنى حلمي وأنا ما زانت أحوالي

ألا يالله كان اللي نواني بالردى مرتاح
تعـجــل بالليـــال اللي تبـــدل مرنـــا حـــالي

سقيت الوقت من عمري ليال ٍ كلها أتراح
عسى اللي باقي ٍ ماهو شقى حالي وغربالي

صحيح إن النخل يشمخ ويشرب من زلال قراح
ولكن شوف عرجونه سجد من ثقل الأحمالي

وأنا لو زادت همومي ترى ماني بها فضاح
وشــكوى ما نقــدمها لغـيــر الخــالق إذلالي

ولو طالت مسافاتي وحطت بالضلوع رماح
وقـفـت وداخــلي ثــــورة بـراكـيـن ٍ وزلزالي

أنا ربتني الدنيا تجارب والحياة كفاح
وهــامـة تـاصل العــزة بعـزة نفـس تختالي

أبفخر وأبدل أيام التعاسه والشقى بأفراح
وأبعـلـن للملا نصري بسـاحة كلها أبطـالي

يقولون الحصاد اللي على راس السنة ذباح
وأنا من قبل لا تبــذر بـذوري سامي ٍ حالي

وأشوف غراب لو طارت طيور تروعها الأشباح
بقى يطـمر عـلى الرجلين يريد بخسته مالي

وأنا مالي سنابل قمح.. حمطة... والعصى لي سلاح
وبعـض من شقى السقيا وصبر ٍ كنه جبالي

ولكن يا غراب أسود سوادك ما جلى الإصباح
سوادك عار في وجهك وصوتك ما شغل بالي

تفارقنا ولكن يا غراب ٍ جيت لك نصاح
تجـنـب درب تـمـشي بـه وصــد ٍ مـاله إقـبالي

تجنب دربك الأول وبعض الناس لو لك صاح
ترى وده تـكون الباب وهـو من خلفك احتالي

وانا ماني مدور من ورى نصحك كثير أرباح
ولا أنته في حساباتي عزيز .. ولا ولد غالي

ولكن مبدأي عشته أبنصح لو وجيه كلاح
تـفـكـر في معــانيـها قـبـل لا أعـيــدها تــالي

وبعد النصح ياليلي متى بنطفي المصباح
لصار إن السعادة في وجودي بالخلا لحالي