وأنا قـدام برج الفيـصلـيه
أسـولف عنك والحاله شقيه

تذكرتك وزال الهم عني
تمنـيـتـك مع القمرا خـويه

أنا واياك يا خـلي عشـقـنا
مثـل قيس ٍ وليلى العامريه

تباريح المحبه في غيابك
تزيد الشوق فالدنيا الخليه

علاقتنا على انقى عـلاقة
علاقة خاليه من كل سيه

تجمعـنا على ذيـك اللـيـالي
وفــرقـنــا زمان العـنجهيه

تكابر في غلاي وفي ودادي
واكابر في هوى بنت بدويه

لها عين ٍ تزيد الشوق جمر ٍ
ورمش ٍ مثل ظل النرجسيه

ليا نا ضرتها أمشي وراها
نيوتن ما صدق فالجاذبيه

وشعر ٍ لو وصفته ما وصفته
تحـركه النسـايم فالـعـشـيه

طويل ٍ ناعم ٍ مرسل عليها
على الأكتاف سوى له ثنيه

وخد ٍ كنه الرمان لونه
مثل ٍ ورد ٍ يزين مزهريه

لها أنف ٍ أنف عن كل شين ٍ
وسلة سيف ما مثله حليه

ومبسم أحمر ٍ وردي شفاته
بياض الثلج لا شفت الثنيه

وعنق ٍ مثل ظبي ٍ فالبراري
عطف به يوم وادعنا سويه

وخصر ٍ ناحل ٍ يوم ٍ تثنى
مثل بان ٍ مع ارياح ٍ قويه

تمايل به دلال ٍ مع تغلّي
على محبوب من بين البريه

ولكن الليالي ما اسعفتنا
تفارقنا على أبسط قضيه

تغلى لين مليت التغلي
وقفى والليالي سرمديه

بدمع العين أسقي وردتين ٍ
زمان الحب جابتها هديه

وهي بدموعها تسقي ورودي
ألا يا شين عبرات ٍ عصيه

تركنا بعضنا والحب باقي
وفرقنا زمان العنجهيه