غابت ليالي بسمتك عدة شهور
حسيت فيها بالغلا يا أرهف الحس

كنت اتوقع غيبتك مالها شعور
لكن حمست القلب في داخلي حمس

وأتوقع إن النور ما يحجبه نور
ويومن لفى نورك حجب طلعت الشمس

وأتوقع إن الحور ما مثلهن حور
وأثرك تفوقتي على الجن والأنس

وأتوقع إن الناس لو تبني السور
ما تمنع المحبوب من كلمته همس

وأتوقع إني طحت محتاج دكتور
ومديت لك قلب ٍ على راحة الخمس

داوي صويب ٍ من عنى البعد مكسور
محتاج من حط الأمل داخل اليأس

سحابة الأشواق في قلب مبهور
تبحث عن اللي ورد يحرم على اللمس

قلب ٍ بحبك صار بالحيل مشهور
لا شاف طيفك مع نسانيس له نس

يا مر عليه الطيف آمر ومأمور
يا مر عليه الطيف ما قال له بس

معذور في حبك بلا شك معذور
لأنك حبسته بين الأضلاع في حبس

فيك انتهى حب ٍ بدا منك بعطور
وغيرك طمسته من حياتي ترى طمس

متى نشوفك وأبيض الورد منثور
يمكن تجي باكر إذا غايب ٍ أمس

في رجعتك سطرت من شعري سطور
متى نشوف الهمس والصمت والرمس ؟

يا غايتي مديت لك باقة زهور
كاتب عليها (للغضي مرهف الحس)